“SİMA İmza” ilə “Həyatın yaşam sığortası”nı məsafədən əldə etmək mümkün olub.

Rəqəmsal İnkişaf və Nəqliyyat Nazirliyinin tabeliyindəki “AzInTelecom” MMC tərəfindən yaradılmış SİMA yeni nəsil rəqəmsal imza sığorta sektorunda tərəfdaş çevrəsini genişləndirməyə davam edir. “SİMA İmza” vasitəsilə xidmətlərini rəqəmsallaşdıran növbəti qurum “Xalq Həyat” Sığorta Şirkəti ASC olub.

Fins.az xəbər verir ki, indi müştərilər şirkətin veb-saytından şəxsi kabinet səhifəsinə keçid edərək “SİMA İmza” vasitəsilə “Həyatın yaşam sığortası” xidmətini rahatlıqla əldə edə bilərlər. Artıq bunun üçün müştərilərin sığorta şirkətinə getməsinə, sənədləşmə işlərinə vaxt sərf etməsinə və fiziki imza çəkməsinə ehtiyac yoxdur.

Belə ki, sənədlərin “SİMA İmza” vasitəsilə uzaqdan elektron formada imzalanması müştəri məlumatlarının anında təsdiqlənməsini və xidmətin əlçatanlığını təmin edir. Bu isə vətəndaşların vaxtına, sığortaçının isə xərclərinə qənaət etməsinə imkan yaradır. Eyni zamanda müştərilər kağız daşıyıcılardan azad olurlar.

Qeyd edək ki, yaxın gələcəkdə “SİMA İmza”nın “Xalq Həyat” Sığortanın digər xidmətləri üzrə də inteqrasiyası planlaşdırılır.

“SİMA İmza” ilə vətəndaşların xidmət mərkəzlərindən asılılığına son qoyulur, xidmət göstərənlərin iş yükü və xərcləri azalır. Azərbaycan vətəndaşları, fərdi sahibkarlar və Azərbaycanda qanuni əsaslarla yaşayan əcnəbilər olduğu yerdən elektron xidmətlərdən yararlanırlar.

Həmçinin “SİMA İmza”nın istənilən sistemə inteqrasiya oluna bilməsi istifadəçilərə sürətli və istənilən sayda imzalama imkanı qazandırır. Rəqəmsal xidmətlərə əlçatanlığı artıran “SİMA İmza” ölkəmizdə biznes proseslərini sürətləndirəcək.

Mobil tətbiqi yükləməklə əldə olunan “SİMA İmza” vətəndaşlar üçün tam pulsuzdur. SİMA yeni nəsil rəqəmsal imza ilə bağlı daha ətraflı məlumatı www.sima.az saytından və “157” Zəng Mərkəzi ilə əlaqə saxlayaraq əldə edə bilərsiniz.